çığanaq: ktat.krymr.com

Qırımnıñ Keriç rayonında Rusiye uquq qoruyıcıları merkeziy rayon hastahanesiniñ emşiresini Rusiye ordusını aqaretlegeni ve Ukrayına Silâlı quvetlerine qoltutqanı içün tuttı. Bu aqta Rusiye tarafdarı bloger Aleksandr Talipovnıñ «Krımskiy SMERŞ» Telegram kanalı bildire.

Videoğa köre, uquq qoruyıcılar emşireniñ iş yerine keldi. Berilgen malümatqa köre, qadın «Odnoklassniki» içtimaiy ağında «Ukrayına Silâlı Quvetlerine qoltuttı, Ukrayına askerini ürmet etmege talap etti, Rusiyeni natsist devlet dep adlandırdı».

«Krımskiy SMERŞ» qadınnıñ afu sorağan videosını derc etti. Onı basqı altında çıqarğandırlar.

Rusiyede ve onıñ tarafından işğal etilgen topraqlarda quvetçiler Ukrayına tarafdarlarını taqip ete. Rusiye tarafdarı qırımlı bloger Aleksandr Talipov öz telegram kanalında Ukrayınağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar tutula ve Rusiye ordusınıñ «areketini yaramaylaştırğanı» içün memuriy ve cinaiy mesüliyetke çekile.

Rusiye Federatsiyası büyük istilâğa başlağan soñ Rusiye ordusınıñ «diskreditatsiyası» aqqında Memuriy cinayetler kodeksiniñ 20.3.3 maddesi kirsetildi. Rusiye-Ukrayına cenki aqqında malümat tarqatqanlar ve Kremlniñ noqta-i nazarına zıt kelgen er angi fikir bildirgenler taqip etile. Rusiye öz qanunlarını yarımada territoriyasına kenişlete, şunıñ içün qırımlılar da bu madde boyunca mesüliyetke çekilmek telükesi altında buluna.

Ukrayına prezidentiniñ Qırım Muhtar Cumhuriyetindeki daimiy temsilcisi Tamila Taşeva haber etkenine köre, 2023 senesi Rusiye Federatsiyasında ve Ukrayınanıñ işğal etilgen topraqlarında ordunı itibardan tüşürgen er altıncı ceza Qırımda qayd etildi. Açıq davalarnıñ sayısı ise 70,6% arttı.

«Copyright © 2020 RFE/RL, Inc. Передруковується з дозволу Крим.Реалії (Радіо Вільна Європа / Радіо Свобода)»