çığanaq: ktat.krymr.com
Rusiye saylavları arfesinde işğal etilgen Qırımda Rusiye Federatsiyasınıñ uquq qoruyıcıları qırımtatar faallerine «qanun bozulmaycağına dair tenbiler» bermege tırışa, dep haber etti Qırımtatar Milliy Meclisiniñ reisi Refat Çubarov.
«Endi vefat etken insanlarğa bile böyle «tenbiler» berilgen edi», – dedi Çubarov.
Onıñ fikirince, saylavlar arfesinde qırımtatar faalleriniñ evlerini kütleviy şekilde ziyaret etip ve olarğa «tenbiler» berip, Rusiye uquq qoruyıcıları «Rusiye işğalci akimiyetiniñ qanunsızlığına» qarşı çıqqan qırımtatarlarnı qorquzmağa tırışa.
#LiberateCrimea Qırımnı işğalden qurtaruv halqara areketiniñ Qırım bölügi Qırım.Aqiqatqa tarif etkenine köre, Rusiye akimiyeti işğal altındaki Qırımda «saylavlarğa azırlıq ve keçirilüv vaqtında qanunsız areketlerge yüksek seviyeli azırlıq» informatsion kampaniyasını başlattı.
Sentâbrniñ 6-8-nde işğal etilgen Qırımda Rusiye akimiyeti Qırımnıñ Rusiye parlamenti ve yerli şura deputatlarınıñ saylavlarını keçirmege planlaştıra. Ukrayina ve demokratik halqara toplulıq Qırımdaki Rusiye saylavlarınıñ keçirilüvini Ukrayina ve halqara uquqını bozğan, qanunsız dep saya.